LOVE STORY 2050 ke baad 1920....Sabne pehli baar 1920 ka naam sunne ke baad shaayad yahi socha tha ki naye stars wali film aakhir kya kar paayegi aur woh bhi AITBAAR, JURM, RED, ANKAHEE, LIFE MEIN KABHI-KABHI aur SPEED jaisi flops de chuke Director Vikram Bhatt se kisi ko aur ummeed bhi kya ho sakti hai. Maine bhi yahi socha tha.
Monday ko main ghar ke baahar tha ki tabhi tez baarish shuru ho gayi, main bike se tha toh main bhi bheeg gaya.Saamne hi ek multiplex tha, toh maine socha ki chalo ek film hi dekh lete hain, boriyat bhi door ho jaayegi aur kapde bhi sookh jaayenge.
Film ka ticket lene pahauncha toh pata chala ki is samay saare shows chal rahe hain aur sirf 1920 ke hi tickets available hain.Wahan khade sablog 1920 ke hi ticket khareed rahe the toh maine bhi isi film ka ek ticket le liya aur chal pada hall ke andar.Film shuru hui.Film khatm hone ke baad jab main baahar aaya toh I was just not able to believe that this is a Vikram Bhatt film!!! Toh chaliye, kuch aapko bhi batata hoon film ke baare mein
STORY=Film ki story toh wahi purani hai.Ek purani haweli, usme rehne wali ek aatma etc etc magar film ka treatment jis tarah kiya gaya hai woh kaabil-e-taareef hai.Haweli hamesha ki tarah purani toh zaroor hai magar khandhar nahi.Story ko kabhi bhi kamzor nahi padne diya gaya hai.Jitni der tak film chalegi, aap seat par baithne ko majboor ho jaayenge.
MAIN LEADS=Film mein Hero aur Heroine ke roop mein aapko do naye chehre dikhaai denge.Actor/Model RAJNEESH DUGGAL aur Bollywood mein apna filmi safar shuru karne waali nayi actress, ADAH SHARMA.Film ko in dono ne apni behtareen acting se intresting banaaye rakha.Rajneesh has done a good job.He has played the role of a loving and a caring husband very well.Adah Sharma is like a fresh breeze to Bollywood.Film ke pehle hisse mein Adah ki acting itni khaas nahi lagti magar Interval ke baad saari film mein unhi ki acting dikhaai deti hai.Adah ke facial expressions kamaal ke hain.RAAZ mein Bipasha Basu ke expressions bhi Adah ke expressions ke aage kuch nahi the!!!
MUSIC=Music kuch khaas nahi hai agar uska comparison kiya jaaye Film RAAZ ke saath jiska music ek bahaut bada hit tha aur jo aaj tak logo ko achha lagta hai.Pt.Jasraj ka gaaya hua gaana "Waada...tumse hai waada" ek achcha song hai jiske lyrics bhi kaafi achhe hain aur logo ke zubaan par chad chuka hai.Doosra gaana "Main tumse pyaar karoon" Kailash Kher ki aawaaz mein hai.Sunne mein yeh gaana bhi lajawaab hai aur film ki situation ke hisaab se ekdum fit baithta hai.Teesra gaana hai"Bichhuaa" jise gaaya hai Shubha Mudgal ne aur saath hi ismein Guest appearance kiya hai Rakhi Sawant ne.Yeh gaana sunne mein utna accha nahi lagta.Gaane ko differrent banaane ke liye isme qawwali ka touch bhi diya gaya hai .Phir bhi yeh gaana film mein zabardasti daala hua lagta hai.Log is gaane ko dekhne mein agar 4-5 min. bhi lagaate hain toh woh bhi sirf Rakhi Sawant ki wajah se hi.Baaki koi gaana aisa nahi hai jiske baare mein kuch bhi likha ja sake.Waise film ka music theek thaak kaha ja sakta hai jo sooding music pasand karne waalon ko pasand aa sakta hai.
LOCATIONS=Location mein Director Vikram Bhatt ne zara sa bhi compromise nahi kiya hai.London ke bhutha haweli ke liye unhone jo haweli chuni hai woh din mein dekhne se bahaut hi khoobsoorat aur raat mein dekhne se utni hi daraawni lagti hai.Haweli ke saamne jo jungle hai woh abhi tak sabne sirf stories mein hi suna ya dekha hoga, magar kisi film mein abhi tak aisa jungle nahi dikhaaya gaya hai.Location ke baare mein aur kuch khaas nahi hai kyunki film ka 90 percent hissa haveli mein hi shoot hua hai, lekin location jahan ke liye jo bhi chuni gayi hai woh kaafi acchi hai.
SPECIAL EFFECTS=Is film mein Special Effects ka kaafi istmaal kiya gaya hai jo ki har horro film ke liye zaroori hota hai.Adah Sharma ka hawa mein ud jana, Tower pe ulta chadd jaana jaise scene special effects ki wajah se kaafi acche ban pade hain, balki yeh kaha ja sakta hai ki special effects ne is film ko kaafi achha bana diya hai aur koi bhi effect sara sa bhi nakli nahi lagta jaisa ki aam taur par hindi filmo mein hota hai.
OVER ALL=Over all agar kuch kaha jaaye toh bas yahi kaha ja sakta hai ki Director Vikram Bhatt ne ummeed se badhkar film banaai hai.Dono naye stars unhi ki khoj hai aur apne-apne roles ke saath poora nyaay karte hain.Film, 1920, ki hone ke bawajood, ek fresh feel deti hai jo film ke Director ke direction ka hi kamaal hai.Is film ko agar dekhne ki baat ki jaaye toh main aapko bataana chaahta hoon ki hall mein mere paas jitne log baithe the unme se kai aise the jo is film ko doosri ya teesri baar dekh rahe thi aur khud maine bhi yeh film 2 baar dekhi hai.Toh agar aap ko horror movies pasand hain toh aap ke liye ek entertaining horror movie intzaar kar rahi hai.Main iss film ko 5 mein se 4 stars doonga. Aapko yeh review kaisa laga yeh mujhe zaroor bataaiyega. - Shivam.