Bahaut dino se hum sab yahi sun rahe the ki Chandni Chowk to China aane wali hai. Phir, hum sub yahi sunte rahe ki yeh film ab aayegi, yeh film tab aayegi etc. etc. Phir, aakhir, finally, yeh hum sab ko yeh pata chal hi gaya ki yeh film January mein release ho rahi hai.Maine toh tabhi plan kar liya tha ki Yeh film dekhni zaroor hai, aur, maine aisa hi kiya! Ab maine toh yeh film dekh li, toh ab chaliye aapko bataat hoon is film ke baare mein.
( CAST:)Akshaye Kumar, Deepika Padukone, Mithun Chakraborty, Ranvir Shorey, Chinese actor- Gordan Liu and Rozar Uaan etc.
(STORY): Kai saal pehle, China ko uske dushmano se bachaane waala ek warrior tha, jiska naam tha Lui Shengh. China ki dushmano se raksha karte hue uski maut ho jaati hai. Story mein aage ek Gaon dikhaaya gaya hai jiski mitti mein khazaana hai aur is baat ka pata hai sirf us gaon ke logo par atyaachaar karne waale "Hojo" ko. "Hojo" us gaon ke logon ko zabadasti bandhak banaakar kaam karaata hai, unpar atyaachaar karta hai. Kisi tarah in logon ko pata chalta hai ki Dharti par unke veer yodhha "Lui Shengh" ka janm kaafi pehle ho chuka hai. Yeh gaon waale nikal padte hai apne is veer yoddha ki talaash mein kyunki inhe lagta hai ki unhe "Hojo" ki ghulaami se ab sirf "Lui Shengh" hi bacha sakta hai. Film mein Akshaye Kumar ka naam hai-Siddhu. Deepika Padukone pehli baar Double role mein screen par aayi hain. Unke Indian Role ka naam hai-SUKI aur unke Chinese role ka naam hai-SUZI. Mithun Chakaraborty ne isme kirdaar nibhaaya hai Dada ka aur RANVIR SHOREY bane hai ek aise Indian pandit jise "Vaastu Shaastra aur Feng Shui" dono ka hi gyaan hai. Ranvir Shorey isme "Chopstics" ka role kar rahe hain.Film ke Story Writer hain Rajat Arora aur Sheedhar Raaghvan.
(BLUNDERS): Ab baat karte hain un blunders ke baare mein jo kabhi ho hi nahi sakte.1- Dada(Mithun Chakraborty) ki ek kick se hi Akshaye Kumar kaise hawa mein itna upar uth jaate hain ki aasmaan mein hi pahaunch jaate hain? Kya Dada mein itni taaqat hai? 2- Upar se Akshaye aur Deepika girte hain aur bachne ke liye Deepika sirf ek umbrella kholti hain aur dono aaram se zameen par aa jaate hai, aur shaayad aap maane bhi na ki neeche aane se pehle dono chaate se latakte hue hi ek gaana bhi gaate hain! 3- Kya koi aisi Dancing Belts bhi ho sakti hain jo koi bhi apne pairon mein baandhkar dance karne lage? Magar is film mein aapko aisi hi belt bhi dekhne ko milegi. 4- Kya koi chaata itna mazboot ho sakta hai ki woh bullets se bhi na fate? Yeh sab kaise possible ho sakta hai yeh toh bas bhagwaan hi jaane!====( CAST PERFORMANCE:) Akshaye Kumar ke baare mein kya kaha jaaye.Unke liye toh yahaan kuch likhne ki zaroorat hi nahi hai. Balki yeh keh sakta hoon ki Akshaye Kumar ne is baar Comedy aur Action ko mix kiya hai. Woh is film mein ek aise Baawarchi(Chef) ka role kar rahe hain jo Dilli ke Chandni Chowk ki Paraanthe wali gali ki ek chhoti si dukaan mein kaam karta hai. Woh har waqt apni kismat ko kosta rehta hai. Usko lagta hai ki kismat uska kabhi saath nahi deti hai. Woh ek behad mamooli sa Dilli ka ek aam aadmi hai magar uske iraade buland hain. Woh kuch aisa karna chaahta hai jisse duniya mein uska naam ho aur uske paas paison ka dher lag jaaye. Deepika Padukone is film mein pehli baar Double Role mein nazar aayengi. Aur, woh bhi ek achche aur ek grey shade ke character mein.! Deepika ismein do judwaa sisters ka role kar rahi hain jo bachpan mein bichad jaati hain. Ek toh India mein palti hai jiska naam hai Suki aur doosri badi hoti hai China mein jiska naam hota hai Suzi. Waise, pehli baar Deepika ko grey shade mein bhi dekhna kaafi achcha laga. Chinese role mein unka getup awesome tha. Mithun Chakraborty ismein Dada ka character kar rahe hai.na.na.Akshaye Kumar ke dada ka nahi, balki aise aadmi ka jiska naam hai Dada. Dada ko bachpan mein Akshaye ek kachre ke dabbe mein milta hai aur dada hi uske padha likha ke bada karta hai. Dono ka duniya mein ek doosre ke siwa aur koi nahi hai. Hamesha ki tarah, Mithun Da ne is chotte se role mein bhi jaan daal di hai. Unke role ko film mein thoda sa bada hona chaahiye tha. Ranvir Shorey apne jis andaaz ke liye famous hain, is film mein bhi woh apne usi andaaz mein dikhaayi diye hain. Woh ismein Akshaye ke guru bane hai jo thode chaalu type ka hai lekin dil ka achcha hai. Apne is role se woh poori film mein viewers ko hasaate rahe. Unka role bhi kaafi achcha hai aur unhe dekh kar lagta hai ko woh abhi kaafi door tak jaayenge.Film mein kai Chinese artist bhi hai jinka kaam bhi kaabile-gaur hai.
(MUSIC): Film ka music utna achcha nahi hai jiski ummeed thi. Film ka koi bhi gaana Dance no. nahi hai. Waise dekha jaaye toh film mein do hi gaane theek-thaak hain. Ek gaana hai "Chandni Chowk to China" ka Title Track jo ki bas theek-thaak hi hai. Film ka doosra gaana hai "CC2C". Is gaane ko promo mein toh bahaut dikhaaya jaa raha tha magar film mein yeh gaana last mein hai isliye zyaadatar logo ne ise dekhne ke liye time hi nahi diya. Ek gaana aur hai jo kuch logo ko pasand aa sakta hai, "Naam hai Sidhhu". Yeh gaana poori film mein aapko sunaai deta rahega. Is gaane ko gaaya hai" Kailash Kher" ne. Baaki koi gaana aisa nahi hai jo aapko yaad bhi rahe.Is film ke gaano ke gaano ko gaaya hai- Neeraj Sridhar, Anushka Manchandani, Shankar Mahadevan, Bappi Lahidi, Ravi Khanvilkar, Shreya Ghoshal, Bohemiya aur Akshaye Kumar ne bhi ek gaana gaaya hai.Saath hi aisa bahaut dino baad dekhne ko mila ki ek hi film mein kai Music Directors saath kaam karein, jaisa ki is film mein hua. Is film ke Music Directors hain- Shankar Mahadevan, Loe Mendosa, Ehsaan Noorani, Bappi Laahidi, His Son- Bappa Lahidi, Kailash Kher, Naresh-Paresh and Bohemiya jabki LYRICS hain Rajat Arora, Shaili Shailendra, Kailash Kher aur Bohemiya ke.
( DIRECTION): Is film ke Director hain "Nikhil Adwani". Aapko shaayad yaad ho ki yeh wahi director hain jinhone kuch saal pehle "Kal ho na ho" aur "Salaame-e-Ishq" Direct ki thi. Film ka direction achcha hai, magar Nikhil Adwaani ne China ko utni achchi tarah se Capture nahi kiaya hai jitna ki karna chaahiye tha. Magar main unko Thanks kehna chaahoonga ki unhone Salaame-e-ishq ko dohraaya nahi.Film ko Produce kiya hai Ramesh Sippy, Mukesh Talreja aur Rohan Sippy ne.
( ACTION:) Action toh iss film ki jaan hai. Akshaye Kumar toh khul ke is film mein saane aaye hai. Unhne jamkar action kiya hai. Abhi tak pichli kuch filmon se unhe yeh mauka nahi mil raha tha magar is baar unhone Action ki baarish kar daali. Pehli baar Deepika ne bhi pehli baar kaafi stunts kiye hai jo un par achche bhi lage hain.Well done, Deepika. Action lovers ko yeh film kuch zyaada hi pasand aayegi.Action zindabaad!=========================( AMAZING FACT): Pehle is film ko naam diya gaya tha " MERA NAAM CHIN CHIN CHU MADE IN INDIA" magar baad mein iska naam chotta karke rakh diya gaya " CHANDNI CHOWK TO CHINA"
( OVERALL): Overall, main yahi kahoonga ki is Friday ek Boring film aapka intzaar kar rahi hai. Lekin, Iss fim mein har woh masaala hai jo ek Indian film mein hona chaahiye jaise, Comedy, Action, Emotion, Drama, Villain aur bhi bahaut kuch par agar nahi hai toh achcha music. Meri advice yeh hai ki aapko is movie se Bachna chaahiye kyunki yeh film aaoki aankhon ke liye Haanikaarak saabit ho sakti hai! Aapko yeh review kaisa laga, muje zaroor bataaiyega.I’ll b wating for ur valuable comments!
Shivam.