Kya hai yeh? Nahi pehchaana? Arre, yeh , "TU MERI DOST HAI" gaane ki starting hai.Bas isi gaane ki wajah se saare log yeh film dekhne gaye the magar film dekhne ke baad toh yahi kaha ja sakta hai ki film ke naam mein toh extra letters zaroor hain magar film mein kuch bhi extra nahi hai jiski taareef ki ja sake...Toh, maine toh yeh film dekh li hai aur lijiye, pesh hai iss film ka review...
CAST: Deven(Salman Khan), Gyanesh(Anil Kapoor), Danny(Zayed Khan) aur Anushka(Katrina Kaif).
STORY: Story bahaut hi simple hai.Teen bhaiyon ki kahani hai jo apne apne hisse ki jaaydaad paana chaahte hain.Katrina isme ek musician ka role play kar rahi hain.Boman Irani ne isme Katrina ke pita ka kirdaar nibhaaya hai.
PERFORMANCES: Salman Khan hamesha ki tarah film mein kaafi handsome lage hai magar iss baar bhi over acting un par haavi rahi hai. Katrina Kaif ke liye film mein kuch karne laayak nahi tha aur iss baar woh utni beautiful bhi nahi lagi hai. Anil Kapoor par saari film based thi aur unhone apne kirdaar ko bahaut hi achchi tarah se jiya hai. Maansik roop se kamzor aadmi ki bhoomika bahaut achche se jee hai...Hats off to him!!! Zayed Khan ne iss baar pehle se achcha role kiya hai. Unki acting mein iss baar thoda prefection dikhaai diya. Waise dekha jaaye toh iss film ne Anil Kapoor ke siva aur kisi ko apni speciality dikhane ka mauka hi nahi diya. Na hi Katrina Kaif apne Glamourous andaaz mein dikhi jiske liye woh famous hai aur na hi Salman ko apni body sahi se dikha paane ka mauka mila.!!!
MUSIC: Jis gaane ki popularity ki wajah se sab film dekhne gaye the bas wahi gaana achcha laga jiska naam hai, "TU MERI DOST HAI".Iss film ko dekhne ke baad aap jab baahar niklenge toh bas aapko yahi gaana yaad rahega. Doosra gaana hai "SHANO SHANO".Iss gaane ko theek-thaak kaha ja sakta hai magar achcha nahi.Film ke end mein ek gaana aur hai, "MASTAM MASTAM" yeh gaan bhi OK-OK hai magar sunne mein achcha lagta hai. Baaki poori film mein koi gaana aisa nahi hai jiske baare mein kuch bhi likha ja sake. Overall film mein sirf ek hi gaana accha hai jo hai "TU MERI DOST HAI".
LOCATIONS: Film mein locations acchi rakhi gayi hain. Katrina Kaif ke ghar ka set kaafi achcha hai. Saath hi film ke last mein ek music concert hota dikhaaya gaya hai jiske liye film ka best set banaya gaya hai aur woh bahaut hi achcha hai. Film ki outdoor locations bhi kaafi achchi hain.
DIRECTION: Showman, SUBHASH GHAI se jo ummeed thi woh teesri baar toot ti hui nazar aai. Taal unki ek hit film thi. Usi film mein unke ek actor the, Anil Kapoor. Bas wahi ek hain jinki acting film mein dikhti hai baaki Subhash Ghai kisi bhi actor se ummeed ke mutaabik kaam nahi kara paaye hain. Haan, film ke BHAVYA sets dekhkar pata chalta hai ki yeh Subhash Ghai ki film hai...
OVERALL: Overall main yahi kehna chaahoonga ki yeh film ek boring film hai.Agar sirf bhaaiyon ki ladaai aur pyaar hi dikhana tha to uske liye 3 ghante ki film kyun banaai? Mujhe khud film dekhkar yeh lag raha tha ki yeh film kab khatam ho aur main theater se baahar jaaun. Yeh film sirf weekend mein hi accha collection kar paayegi magar Monday tak jaise jaise film ke reviews aana shuru honge, iss film ke collections girte hi jaayenge. Jitne bhi log yeh film dekhne aaye the woh sirf "TU MERI DOST HAI" gaana dekhne ke liye hi aaye the, Jo log iss film ko dekhne jaa rahe hain unse main bas yahi kehna chaahta hoon ki agar aapke paas 3 ghante hain bor hone ke liye, toh aap yeh film dekhne ja sakte hain....Aapko yeh review kaisa laga, yeh mujhe zaroor bataaiyege..I’m waiting for ur comments!!! Respected readers, I would very humbly like to request you all to please do write your comments on my review. That helps me a lot to keep improving my Movie Review....Thanks...Shivam.